Një zjarr i rëndë ka shpërthyer në një azil pleqsh në ishullin indonezian Kelibia, duke shkaktuar vdekjen e 16 personave dhe plagosjen e tre të tjerëve, njoftuan autoritetet lokale.

Ngjarja e rëndë ka ndodhur mbrëmjen e së dielës, në një kohë kur shumica e të moshuarve ndodheshin në dhomat e tyre duke pushuar. Sipas autoriteteve, flakët u përhapën me shpejtësi, duke e bërë të vështirë evakuimin në kohë të të gjithë personave brenda objektit.

“Kemi 16 viktima dhe tre persona të plagosur që kanë pësuar djegie,” deklaroi Jimmy Rotinsoulou, duke shtuar se shumica e viktimave u gjetën brenda dhomave të tyre.

Forcat e emergjencës arritën të nxjerrin gjallë 12 persona nga godina në flakë, të cilët u transportuan me urgjencë në një spital aty pranë për të marrë ndihmë mjekësore.

Shkaqet e zjarrit mbeten ende të paqarta, ndërsa autoritetet kanë nisur hetimet për të zbardhur rrethanat e plota të ngjarjes.

Mediat e huaja theksojnë se zjarret vdekjeprurëse janë relativisht të shpeshta në Indonezi, një arkipelag me mbi 17 mijë ishuj, ku shpeshherë ndërtesat nuk përmbushin standardet e nevojshme të sigurisë.