Kryetari i Partisë Demokratike, Sali Berisha, në një konferencë me gazetarët nga selia blu, ka bërë thirrje për mobilizim opozitar, duke e cilësuar ditën e nesërme si vendimtare për qytetarët kundër qeverisë.

“Nesër është prova e madhe, është dita e guximit, e revoltës, e zemërimit, e ngadhënjimit qytetar mbi të keqen më të madhe që ka mbërthyer Shqipërinë, që ka pllakosur këtë vend nga ditët e zeza të diktaturës hoxhiste gjer sot,” deklaroi Berisha.

Ai theksoi se “nesër qytetarët, populli opozitar i bën gjyqin kryehajdutit të këtij kombi”, duke akuzuar drejtpërdrejt kryeministrin për lidhje me krimin e organizuar. “I bën gjyqin kryeministrit të lidhur kokë e këmbë me vrasës, banditë, trafikantë,” u shpreh ai.

Sipas Berishës, qeverisja aktuale ka shkaktuar largimin masiv të shqiptarëve nga vendi. “I bën gjyqin antishqiptarit më të zi të kohërave që ka përzënë nga ky vend në 10 vite 1 milion e 100 mijë shqiptarë vetëm në hapësirën evropiane, pa llogaritur hapësira të tjera,” tha ai.

Kreu i PD e cilësoi kryeministrin si “një armik të egër të lirive të shqiptarëve, të votës së tyre”, duke shtuar se bëhet fjalë për “një njeri që qëndron në pushtet duke përdorur çdo mjet të paligjshëm, duke shkelmuar Kushtetutën”.

Në përfundim, Berisha theksoi se protesta e nesërme ka një domethënie më të gjerë politike. “Nesër është dita e gjykimit të popullit shqiptar për një organizatë kriminale që nuk e ka sot asnjë vend tjetër në Europë,” deklaroi ai, duke ritheksuar se “nesër qytetarët, populli opozitar i bën gjyqin kryehajdutit të këtij kombi”.