Autoritetet zbardhën detajet e ngjarjes së djeshme në lagjen Guerrile, Shkodër, ku një person qëlloi me armë zjarri gjatë ndjekjes nga policia. Bëhet fjalë për 40-vjeçarin Barush Bregu, pjesë e fisit të njohur të Ibrahim Licit, i cili është shpallur në kërkim.

Sipas policisë, rreth orës 15:10, punonjësit e rendit i bënë shenjë ndalimi një automjeti, i drejtuar nga 43-vjeçari Ervis Baba, me pasagjerë një të mitur dhe vetë Bregun. Baba nuk iu bind urdhrit dhe vijoi lëvizjen me manovra të rrezikshme, duke detyruar policinë të nisë ndjekjen.

Gjatë largimit, Bregu dyshohet se ka zbritur nga automjeti dhe ka qëlluar në ajër me pistoletë, për të kanosur efektivët. Arma e përdorur u sekuestrua bashkë me automjetin tip “Volkswagen Seat”.

Materialet procedurale u referuan Prokurorisë së Shkodrës për veprat penale: “Kanosja”, “Mosbindja ndaj urdhrit të punonjësit të Policisë”, “Prishja e qetësisë publike”, “Prodhimi apo mbajtja pa leje e armëve dhe municionit” dhe “Moskallëzimi i krimit”.