Deputeti i Partisë Demokratike, Belind Këlliçi, ka ngritur shqetësime të forta lidhur me rrugëtimin e Shqipërisë drejt Bashkimit Evropian, duke e vlerësuar qeverinë aktuale të kryeministrit Edi Rama si të paaftë në garantimin e zgjedhjeve të lira e të ndershme.

Në një reagim nga selia qendrore e Partisë Popullore Europiane (EPP) në Bruksel, Këlliçi tha se Shqipëria prin ndër vendet anëtare për problemet në proceset elektorale:

“Shqipëria prin mes çdo vendi anëtar përsa i përket problemeve me zgjedhjet e lira e të ndershme, pasi tashmë prej një dekade organizon ‘procese votimi’ dhe qershia mbi tortë mbetet farsa elektorale e zhvilluar më 11 Maj të 2025.”

Këlliçi theksoi se shkëmbimi i përvojave me kolegët europianë forcon bashkëpunimin ndërkombëtar dhe është ky çelësi për të përballuar sfidat e përbashkëta dhe për të avancuar drejt një Europe më të fortë e të bashkuar.

Duke kritikuar qeverinë shqiptare, deputeti shtoi:

“Sa për Edi Ramën dhe bandën e tij në qeveri, tashmë çdo shqiptar apo ndërkombëtar është i qartë se më shumë vlerë ka mbrojtja e të korruptuarve dhe krimit të organizuar, sesa rrugëtimi Europian i Shqipërisë. Qeveria e Ramës ngeli në klasë në testin kritik ‘Balluku’!”

Reagimi i Këlliçit vjen ndërkohë që Shqipëria po përballet me shqetësime të rënda për standardet e zgjedhjeve dhe proceset demokratike, që sipas tij, pengojnë avancimin drejt anëtarësimit në BE.