Prefekti i Tiranës, Shkëlqim Hajdari, ka deklaruar se zjarri që përfshiu një pallat në kryeqytet është vënë nën kontroll pas ndërhyrjeve të vazhdueshme të forcave zjarrfikëse dhe emergjencave.

Në një komunikim për mediat, ai tha se operacioni vijon ende në terren, ndërsa po kryhen evakuime të banorëve nga ndërtesa dhe zona përreth.

“Një operacion shumë i vështirë. Nuk kemi viktimë. Kemi të dëmtuar me djegie dhe dëmtime të karakterit jo të rëndë. Janë nxjerrë disa banorë të pamundur nga gjendja shëndetësore. Para 10 minutash u evakuua një person i moshuar. Për të qetësuar të gjithë opinionin publik, zjarri është vënë nën kontroll. Por operacioni do të vazhdojë deri në fund, kur të neutralizohet i gjithë zjarri”, u shpreh Hajdari.

Ai shtoi se në operacion janë angazhuar zjarrfikëset, Forcat e Ndërhyrjes së Shpejtë dhe strukturat e emergjencës civile, ndërsa theksoi se situata mbetet ende nën monitorim.

Prefekti u shpreh gjithashtu se është urdhëruar Bashkia e Tiranës dhe strukturat përkatëse që të ofrojnë ndihmë për banorët e prekur nga ngjarja.

“Unë jam prefekti i qarkut të Tiranës dhe dal përpara jush jo për të bërë politikë. Shteti është këtu”, tha ai.