Seanca plenare është shoqëruar me akuza të forta nga opozita lidhur me aksionin e fundit të Prokurorisë së Posaçme (SPAK), që ka vendosur sekuestrimin e pasurive me vlerë rreth 40 milionë euro ndaj personave të përfshirë në hetimet për AKSHI-n, përfshirë ish-drejtoreshën Mirlinda Karçanaj dhe biznesmenët Ergys Agasi dhe Ermal Beqiri.

Nga foltorja e Kuvendit, deputeti i Partisë Demokratike Klevis Balliu kërkoi praninë e kryeministrit Edi Rama në sallë, duke thënë se ai duhet të japë shpjegime për situatën e krijuar.

“Do të ishte e udhës që kryeministri të ishte këtu, pasi është i vetmi kryeministër në botë i kapur në flagrancë në mashtrim,” deklaroi Balliu.

Ai iu referua edhe deklarimeve të mëparshme të kryeministrit për ish-drejtoreshën e AKSHI-t:
“Ka thënë se është një njeri që s’ka as shtëpi, as makinë… dhe sot del me apartamente në zona ku metri katror shkon 5.000 euro.”

Balliu akuzoi gjithashtu për përfitime të paligjshme nga tenderat publikë dhe përmendi figura të përfshira në hetime, duke i cilësuar si pjesë të një sistemi të korruptuar.

“Pikërisht me këto denoncime janë arritur hapa. Disa që ju i bëtë investitorë strategjikë sot janë në burg,” tha ai.

Në vijim, ai theksoi se denoncimet e opozitës kanë ndihmuar në zbardhjen e rasteve të korrupsionit, ndërsa akuzoi qeverinë për bllokim të integrimit europian.

“Sot kryeministri duhet të ishte këtu dhe të jepte llogari… Integrimi i Shqipërisë në BE ka vetëm një shpresë: largimin tuaj,” përfundoi Balliu.

Debatet mbi çështjen e AKSHI-t vijojnë të dominojnë përplasjet politike në Kuvend, ndërsa mazhoranca dhe opozita mbeten në qëndrime të kundërta.