Seanca plenare në Kuvend u shoqërua me akuza të forta nga opozita, ku deputeti i Partisë Demokratike, Belind Këlliçi, kërkoi që fokusi i diskutimeve të ishte te çështja e AKSHI-t dhe jo te procesi i integrimit europian.

Në fjalën e tij, Këlliçi iu referua veprimeve të fundit të SPAK, duke theksuar se janë sekuestruar pasuri me vlerë mbi 40 milionë euro ndaj ish-zyrtares Mirlinda Karçanaj dhe biznesmenëve Ergys Agasi dhe Ermal Beqiri.

Ai kritikoi drejtpërdrejt qeverinë dhe reagoi ndaj deklaratave të kreut të grupit parlamentar të PS, Taulant Balla, për integrimin në BE:
“Krenoheni që bëni punë… Para pak u fol në foltore për arritje imagjinare. Shqipëria për pak sa jemi vend anëtar i BE. Po këta janë mashtrime skandaloze.”

Këlliçi ngriti gjithashtu shqetësimin për korrupsionin dhe perceptimin ndërkombëtar:
“Si flet është kthyer Shqipëria në vendin kyç të pastrimit të parave… Komisionerja për zgjerim përmendi vetëm Malin e Zi. Shqipëria nuk përmendet më.”

Duke u ndalur te çështja e AKSHI-t, ai akuzoi kryeministrin Edi Rama për mbrojtje publike të ish-drejtores së institucionit:
“Kryeministri ka bërë avokatinë e Mirlinda Karçanajt, ka thënë është e pastrehë… Doli zonja në fjalë me 4 vila, shofer privat e dhjetëra mijëra metra truall në pronësi.”

Në përfundim, deputeti demokrat kërkoi përgjegjësi për këtë çështje:
“A mban njeri përgjegjësi për këto?”

Debati për dosjen e AKSHI-t dhe procesin e integrimit europian vijon të thellojë përplasjet mes opozitës dhe mazhorancës në Kuvend.