Ministria e Shëndetësisë ka bërë të ditur se buxheti për barnat në vitin 2026 arrin në 19.5 miliardë lekë, me një rritje të posaçme të dedikuar për barnat onkologjike. Sipas autoriteteve, kjo masë synon të garantojë furnizim të qëndrueshëm dhe të pandërprerë për pacientët që trajtohen me sëmundje tumorale.

Ministrja theksoi se rritja e fondit nuk është vetëm një tregues financiar, por një angazhim për zgjerimin e aksesit në trajtime jetike dhe për forcimin e sistemit të furnizimit me barna.

Paralelisht, ajo prezantoi edhe reformën në shërbimin onkologjik, e cila parashikon kalimin nga një sistem i centralizuar në një model të ri të organizuar në rrjet kombëtar.

Sipas saj, në qendër të këtij ndryshimi do të jetë ngritja e Institutit Kombëtar të Tumoreve, i cili do të ketë funksione spitalore, kërkimore dhe universitare.

“Instituti do të shërbejë si qendër reference kombëtare për onkologjinë, do të përditësojë standardet klinike dhe do të zhvillojë udhëzimet profesionale për trajtimin e sëmundjeve tumorale”, u shpreh ministrja.

Ajo shtoi se institucioni do të funksionojë edhe si qendër akademike në bashkëpunim me Universitetin e Mjekësisë dhe institucione të tjera vendase e të huaja, si dhe do të koordinojë rrjetin onkologjik në spitalet rajonale dhe vendore.

Reforma, sipas ministrisë, synon të krijojë një sistem më të standardizuar dhe më të integruar për trajtimin e pacientëve me sëmundje onkologjike në të gjithë vendin.