Anëtarja e Departamentit të Teknologjisë në Partia Demokratike, Senalda Memeti, ka mbajtur një fjalim kritik gjatë protestës së opozitës para Kryeministrisë, ku denoncoi gjendjen sociale dhe mungesën e meritokracisë në Shqipëri.

Në fjalën e saj, Memeti u ndal te sfidat me të cilat përballet brezi i ri, duke theksuar se të rinjtë po humbin shpresën për të ndërtuar të ardhmen në vend.

“Në këtë vend nuk shpërblehet meritokracia”, deklaroi ajo, ndërsa përmes një serie antitezash përshkroi realitetin që, sipas saj, po jetojnë qytetarët shqiptarë.

“Në vendin tim, i zgjuari goditet e budallai të jep mend. Në vendin tim, drejtësia vritet e krimi mban kuvend”, u shpreh Memeti nga foltorja e protestës.

Ajo kritikoi gjithashtu gjendjen e arsimit, largimin e të rinjve dhe mungesën e perspektivës në vend.

“Në vendin tim e në vendin tënd, universiteti me të rinjtë është zëvendësuar nga barinjtë. Na u premtua Europa e jemi në rrugë me gropa”, tha ajo.

Sipas përfaqësueses së PD-së, Shqipëria po përballet me plagë të thella sociale, ku të rinjtë emigrojnë, ndërsa qytetarët humbasin besimin te demokracia dhe drejtësia.

“Në vendin tim largohen të rinjtë, në spitale vdesin pleqtë. Rinia vritet e të vdekurit as për varr nuk gjejnë vend”, deklaroi Memeti.

Në fund të fjalës së saj, ajo bëri thirrje për angazhim qytetar dhe bashkim të brezit të ri për ndërtimin e një Shqipërie me meritokraci, demokraci dhe drejtësi.

“Le të mblidhemi të gjithë për dinjitet e jo për luftë për pushtet. T’i dalim zot vendit tonë dhe ta çlirojmë nga kjo pakicë kleptomanësh”, përfundoi ajo.