Kryeministri Edi Rama ka reaguar pas akuzave të kreut të Partisë Demokratike, Sali Berisha, lidhur me sistemin e Prokurimeve Publike që do të monitorohet nga Inteligjenca Artificiale.

Në një reagim të publikuar në rrjetin social “X”, Rama hodhi poshtë pretendimet për rënie të integritetit në prokurimet publike, ndërsa theksoi se Shqipëria është vlerësuar pozitivisht në nivel europian.

“Hedh budallai i madh një gur në lumë dhe pastaj të vegjëlit bëjnë si të mençur për ta nxjerrë, duke thënë që integriteti i prokurimeve publike në Shqipëri paska shënuar rënie”, shkruan Rama.

Kreu i qeverisë theksoi se Shqipëria është përfshirë për herë të parë në portalin europian të matjes së integritetit të prokurimeve për vendet e Bashkimit Europian, duke pretenduar se rezultati i vendit ka qenë më i mirë se ai i disa shteteve anëtare të BE-së.

“Po se si e shënoi këtë rënie, kur në fakt Shqipëria u përfshi për herë të parë në portalin europian të matjes së integritetit të prokurimeve për shtetet e Bashkimit Europian, duke dalë më mirë se sa shumë prej tyre, këtë as i madhi e as të vegjëlit nuk kanë se si e thonë”, vijon Rama.

Në reagimin e tij, kryeministri ndalet edhe te projekti “Diella”, sistemi i Inteligjencës Artificiale që do të përdoret për monitorimin e prokurimeve publike.

“Sot Shqipëria vlerësohet ndërkombëtarisht si asnjëherë më parë, edhe në fushën e prokurimeve, ku kemi bërë progres të madh dhe jemi ende në ngjitje, sepse me Diellën në prokurimet publike do të arrijmë brenda këtij mandati, një nivel integriteti e shpejtësie që do të na rendisë në nivelin më të lartë europian, falë Inteligjencës Artificiale”, deklaroi Rama.