Detaje të reja kanë dalë nga konflikti i rëndë i 7 majit në Sarandë, që përfundoi me vrasjen e pronarit të karburantit dhe kryetarit të shoqatës “Çamëria”, Rexhep Ismaili.

Nga dëshmitë e siguruara nga mediat, konflikti dyshohet se nisi pas një debati për para mes 31-vjeçarit Kostandin Vogli dhe tezes së tij, bashkëshortes së Viktor Ruçi, lidhur me pagesat për punën në një restorant në Krorëz.

Në deklarimin e tij, Viktor Ruçi tregoi se konflikti kishte nisur prej kohësh.

“Bashkëshortja ime ka punuar te restoranti i Kostandinit, në Krorëz. Në përfundim të sezonit është debatuar për një sasi të hollash, pasi nuk i kishin bërë llogaritë mirë dhe ka qenë një konflikt midis nipit dhe tezes së tij”, deklaroi ai.

Tensionet u përshkallëzuan pas një takimi rastësor mes tyre në Sarandë, disa orë para ngjarjes tragjike.

Kostandin Vogli rrëfeu se pasi pa Viktorin në makinën e tij, situata agravoi menjëherë.

“Kur kthehem te makina, shikoj në brendësi burrin e tezes, Viktor Ruçi. I thashë: ‘Dil nga makina, të kam ndonjë borxh?’”, deklaroi ai.

Ndërsa Ruçi pretendon se kishte shkuar vetëm për t’u sqaruar.

“Shikoj që ai u shtang nga prania ime dhe i them: ‘Mos u tremb, se dua të sqarohem’”, tha Ruçi.

Pas takimit, sipas dëshmisë së Voglit, ai organizoi përballjen me Ruçin dhe mori me vete edhe persona të tjerë.

“Diskutova me vëllain tim dhe mora 3 shkopinj, dhe me makinën tip ‘Porsche’ jemi nisur për në Gjashtë për të takuar Viktorin”, tregoi 31-vjeçari.

Ai pranoi se konflikti nisi me sharje dhe goditje me shkop.

“Kam zbritur bashkë me vëllain, me shkop në dorë, dhe e kam sharë dhe goditur me shkop”, deklaroi Vogli.

Më pas situata doli jashtë kontrollit.

“Në përleshje e sipër dëgjova një të bërtitur: ‘Nori, kallash!’”, rrëfeu ai.

Sipas hetimeve, gjatë konfliktit Rexhep Ismaili është futur në lokal dhe ka dalë me kallashnikov, duke hapur zjarr disa herë, ku mbeti i plagosur Kostandin Vogli.

Ndërkohë, autori i dyshuar Lulëzim Tabaku dyshohet se e ka qëlluar Ismailin me pistoletë në kokë.

Edhe Viktor Ruçi deklaroi se gjatë konfliktit pa një person të armatosur me pistoletë.

“Kam parë një person të tretë, i cili ishte me pistoletë në dorë dhe ma drejtoi në një largësi rreth 3 metra. Personin nuk e njoha”, tha ai.

Nga frika, Ruçi u fut në tualetin e lokalit dhe aty mësoi për vrasjen.

“Kur isha brenda në banjë dëgjova krisma dhe më thanë: ‘Dil jashtë se vranë Rexhepin’”, deklaroi ai.

Pas ngjarjes, autorët janë larguar me shpejtësi, ndërsa hetimet për zbardhjen e plotë të konfliktit vijojnë.