Një 29-vjeçar shqiptar është arrestuar nga autoritetet spanjolle në Barcelonë, pasi ishte shpallur në kërkim ndërkombëtar nga Franca dhe Spanja për trafik droge dhe përfshirje në organizatë kriminale.

Sipas mediave spanjolle, operacioni është kryer nga Garda Civile e Spanjës më 8 maj, në zonën e njohur Passeig de Gràcia, ku i dyshuari është kapur me armë zjarri në posedim.

Autoritetet bëjnë me dije se ndaj tij ishin lëshuar dy urdhër-arreste europiane nga Franca për trafik droge dhe pjesëmarrje në organizatë kriminale, si dhe një tjetër urdhër-arrest nga gjykatat në Barcelonë për vjedhje automjetesh.

Gjatë arrestimit, policia i ka sekuestruar një pistoletë tip “Makarov” të mbushur me shtatë fishekë dhe të gatshme për përdorim, si dhe dokumente false me shtetësi greke dhe një shumë prej 1.470 euro cash.

Pas ndjekjes nga agjentët e Gardës Civile, 29-vjeçari është neutralizuar dhe arrestuar në vendngjarje, ndërsa arma e sekuestruar rezulton me origjinë sovjetike dhe përdor municion 9×18 mm.

I arrestuari është paraqitur më pas përmes lidhjes telematike para Audiencës Kombëtare të Spanjës, nga Gjykata e Barcelonës, ku pritet të vijojnë procedurat gjyqësore për ekstradim dhe hetim të mëtejshëm.