Efektivi i Policisë së Shtetit, Arsen Toska, 20 vjeç, vijon të mbetet në gjendje të rëndë shëndetësore në Spitalin e Traumës, pasi u plagos gjatë një incidenti të ndodhur në zonën e Kutallisë, në Dimal.

Sipas të dhënave paraprake, i arrestuari Zamir Skënderi, gjatë shoqërimit nga Fieri drejt Komisariatit të Kuçovës, ka arritur t’i marrë armën e shërbimit efektivit dhe e ka qëlluar brenda automjetit të policisë.

Pas ngjarjes, i dyshuari ka tentuar të largohet, por është neutralizuar dhe arrestuar nga dy efektivët e tjerë që ndodheshin në mjet.

Burime nga grupi hetimor bëjnë me dije se gjatë marrjes në pyetje, Skënderi ka deklaruar se nuk mban mend momentin e ngjarjes, duke pretenduar se ka qenë nën efektin e lëndëve narkotike. Po ashtu, dyshohet se gjatë shoqërimit ai kishte me vete edhe një sasi kokaine.

Ndërkohë, hetimet po fokusohen edhe në respektimin e procedurave standarde të sigurisë nga ana e policisë gjatë shoqërimit të të arrestuarit, për të përcaktuar nëse janë zbatuar të gjitha rregullat e parashikuara.

Rasti po hetohet nga Prokuroria e Beratit në bashkëpunim me Agjencinë e Mbikëqyrjes Policore.