Dogana e Maqedonisë së Veriut ka sekuestruar një shumë prej 500 mijë eurosh në pikën kufitare të Tabanocit, të fshehura në një minibus që kishte destinacion Tiranën.
Sipas autoriteteve, drejtuesi i automjetit është një shtetas shqiptar me iniciale XH.G., ndaj të cilit është nisur procedurë penale për transport të paligjshëm parash dhe dyshime për pastrim parash. Paratë dhe mjeti janë sekuestruar si prova materiale.
Minibusi transportonte shtatë pasagjerë në momentin e ndalimit, ndërsa gjatë kontrollit u zbulua një hapësirë e modifikuar posaçërisht ku ishin fshehur shumat e parave, të ndara në 14 qese.
Drejtori i Doganës së Maqedonisë së Veriut, Boban Nikollovski, e ka cilësuar operacionin si një nga sekuestrimet më të mëdha të parave cash në historinë e institucionit.
“Ky është sekuestrimi më i madh i parave cash në historinë e doganave tona. Përpjekja u parandalua falë një operacioni të mirëfilltë të Departamentit Operativ në hyrje të pikës kufitare,” deklaroi Nikollovski.
Autoritetet kanë nisur hetime të thelluara për të zbuluar origjinën e shumës së sekuestruar dhe për të identifikuar persona të tjerë të mundshëm të përfshirë në këtë rast.
