Një person ka mbetur i plagosur me armë zjarri pasditen e djeshme në lagjen Lugina të Shijakut, pas një konflikti të dyshuar për motive të dobëta.

Sipas informacioneve paraprake, i plagosur ka mbetur Bjondi Guri, i cili është qëlluar në këmbë gjatë incidentit.

Menjëherë pas ngjarjes, ai është transportuar drejt spitalit, ku po merr ndihmën e nevojshme mjekësore. Burime paraprake bëjnë me dije se i plagosuri ndodhet jashtë rrezikut për jetën.

Ndërkohë, autori i dyshuar i ngjarjes është identifikuar nga Policia si Elton Beqiri.

Pas marrjes së njoftimit, shërbimet policore kanë mbërritur në vendngjarje, kanë rrethuar zonën dhe kanë nisur kontrolle intensive për lokalizimin dhe kapjen e tij.

Sipas Policisë, ngjarja ka ndodhur rreth orës 17:30, ndërsa grupi hetimor, nën drejtimin e Prokurorisë, po vijon punën për zbardhjen e plotë të rrethanave të plagosjes dhe dokumentimin e saj ligjor.

Autoritetet nuk kanë dhënë ende detaje të tjera mbi motivet e konfliktit, ndërsa hetimet vijojnë.