Një operacion i zhvilluar gjatë ditës së sotme në fshatin Reç i Ri, në njësinë administrative Velipojë, ka çuar në zbulimin dhe asgjësimin e 7446 bimëve të dyshuara narkotike Cannabis Sativa, ndërsa pas aksionit janë marrë masa të menjëhershme disiplinore ndaj drejtuesve lokalë të Policisë.

Sipas njoftimit zyrtar, Drejtori i Përgjithshëm i Policisë së Shtetit, Drejtues Madhor Skender Hita, ka vendosur pezullimin nga detyra të Shefit të Komisariatit të Policisë Shkodër, Shefit të Stacionit të Policisë Velipojë dhe Ndihmësspecialistit të Policimit në Zonë, përgjegjës për territorin ku u zbuluan parcelat me kanabis.

Të pezulluarit janë:

* Kryekomisar Bekim Lika, Shef i Komisariatit të Policisë Shkodër;
* Nënkomisar Zef Marku, Shef i Stacionit të Policisë Velipojë;
* Inspektor Samet Kadroji, Ndihmësspecialist i Policimit në Zonë.

Ndërkohë, Drejtoria e Standardeve Profesionale ka nisur hetim disiplinor edhe për dy punonjës të tjerë policie, pjesë e grupit të kontrollit të territorit.

Në reagimin zyrtar, Policia bën me dije se aksioni u organizua pas një informacioni të mbërritur në postën elektronike të Drejtorit të Përgjithshëm, ku sinjalizohej kultivimi i mijëra bimëve narkotike në një zonë fushore të Reçit të Ri.

“Pas informacionit të ardhur në postën elektronike të Drejtorit të Përgjithshëm të Policisë së Shtetit, për kultivimin e mijëra bimëve narkotike, në fshatin Reç i Ri, Velipojë, në një territor të hapur, lehtësisht të verifikueshëm në zonë fushore, u organizua menjëherë puna për asgjësimin e tyre, si dhe për identifikimin dhe kapjen e autorëve”, thuhet në njoftim.

Për shkak të mangësive të konstatuara në përmbushjen e detyrave, ndaj tre efektivëve është vendosur pezullimi nga detyra, ndërsa hetim disiplinor pa pezullim është nisur edhe ndaj Nënkomisarit D. N., specialist për Hetimin e Krimeve në Stacionin e Policisë Velipojë, si dhe Inspektorit E. I., Ndihmësspecialist i Policimit në Zonë.

Policia e Shtetit thekson se lufta kundër kultivimit të bimëve narkotike mbetet prioritet dhe paralajmëron masa të forta jo vetëm ndaj autorëve të veprave penale, por edhe ndaj çdo punonjësi policie që nuk përmbush detyrimet ligjore.

“Çdo rast do të trajtohet me vendosmëri maksimale dhe pa asnjë kompromis, si ndaj autorëve të veprave penale, ashtu edhe ndaj çdo punonjësi policie që nuk përmbush detyrimet ligjore apo abuzon me detyrën”, thekson Policia e Shtetit.