Një shtetase turke ka raportuar humbjen e kontakteve me një 24-vjeçar, i cili prej disa ditësh rezulton i zhdukur në Tiranë.

Sipas saj, i riu, i identifikuar si Doğukan, nuk është parë që prej ditës së diel dhe nuk ka më asnjë komunikim me familjarët apo miqtë. Të dy jetonin së bashku në një banesë në rrugën “Demir Zyko” në kryeqytet.

Ajo ka deklaruar se fillimisht ka menduar se 24-vjeçari mund të ishte larguar për arsye personale, por shqetësimi është rritur pasi kanë kaluar disa ditë pa asnjë kontakt. Telefoni i tij rezulton i fikur, ndërsa në banesë ka lënë pasaportën. Sipas saj, ai është larguar vetëm me një sasi të vogël parash.

Denoncuesja ka bërë të ditur se është paraqitur në komisariat për të raportuar rastin, por ka hasur vështirësi për shkak të mungesës së një përkthyesi të certifikuar, pasi as ajo dhe as i riu nuk janë shtetas shqiptarë.

“Ju lutem më ndihmoni. Nuk e di çfarë ka ndodhur. Kam pyetur nëpër spitale dhe nuk kam asnjë informacion. Nuk di si t’ia them familjes së tij,” është shprehur ajo.

Sipas dëshmive të saj, i riu kishte shfaqur kohët e fundit shenja ankthi.

Policia është njoftuar për rastin dhe kërkimet për gjetjen e tij vijojnë, ndërsa u bëhet thirrje qytetarëve që të kontaktojnë autoritetet nëse kanë informacion mbi vendndodhjen e tij.