Protestat qytetare në Tiranë, që kanë hyrë në ditën e tyre të 11-të, kanë tërhequr vëmendjen e mediave ndërkombëtare, të cilat po i ndjekin dhe raportojnë zhvillimet në kryeqytetin shqiptar.

Rrjeti mediatik gjerman Deutsche Welle ka publikuar në rrjetet sociale pamje ajrore të realizuara me dron nga protesta e zhvilluar në bulevardin “Dëshmorët e Kombit”, duke e cilësuar atë si mobilizimin më të madh qytetar që nga nisja e lëvizjes.

“Pamjet me dron nga protesta e ditës së 11-të tregojnë pjesëmarrjen më të madhe të qytetarëve të grumbulluar këto ditë në bulevardin ‘Dëshmorët e Kombit’”, shkruan Deutsche Welle.

Media gjermane ndalet edhe te simbolika e protestës së së mërkurës, e cila u zhvillua në përvjetorin e 148-të të Lidhjes së Prizrenit.

“‘Besëlidhja e Tiranës’ – e quajtën protestuesit tubimin e së mërkurës, që ishte edhe mobilizimi më i madh që nga nisja e lëvizjes dhe që u mbajt në 148-vjetorin e ‘Lidhjes së Prizrenit’”, thuhet në raportimin e Deutsche Welle.

Protestat po vijojnë prej 11 ditësh me pjesëmarrjen e qytetarëve nga zona të ndryshme të vendit, ndërsa organizatorët kanë deklaruar se mobilizimi do të vazhdojë edhe në ditët në vijim.