Një sasi e dyshuar kokaine, katër gurë të dyshuar si diamante dhe një pajisje elektronike për zbulimin e metaleve të çmuara janë sekuestruar në Portin e Durrësit gjatë kontrolleve të zhvilluara nga Dogana Shqiptare në bashkëpunim me Policinë e Shtetit.

Sipas njoftimit zyrtar, zbulimet janë bërë në tre raste të ndryshme gjatë verifikimeve të kryera ndaj automjeteve dhe udhëtarëve që mbërritën nga Italia me tragetet e linjës drejt Durrësit.

Rasti i parë u evidentua gjatë kontrollit të një automjeti të ardhur me tragetin Ankona–Durrës. Në bagazhin e mjetit u gjet një valixhe që përmbante një aparaturë elektronike për detektimin e metaleve të çmuara, së bashku me aksesorët përkatës të montimit.

Në një tjetër rast, autoritetet ushtruan kontroll fizik ndaj një shtetasi që udhëtonte me automjet nga Italia, ku u gjetën katër paketime transparente që përmbanin gurë të ngjashëm me diamantet. Gurët janë sekuestruar dhe do t’i nënshtrohen ekspertizave për të përcaktuar natyrën dhe vlerën e tyre.

Ndërkohë, rasti më i rëndësishëm lidhet me zbulimin e një sasie të dyshuar lënde narkotike. Sipas Doganës, kokaina ishte fshehur brenda një veshjeje të vendosur në kabinën e drejtuesit të një automjeti tjetër të ardhur nga Italia.

Në njoftimin zyrtar, Dogana e Durrësit bën të ditur:

“Dogana Durrës, në bashkëpunim me strukturat e Policisë së Shtetit, bllokuan ditën e sotme gjatë disa kontrolleve të kryera në Portin e Durrësit një sasi lënde narkotike të dyshuar si kokainë, katër gurë të çmuar të dyshuar si diamante, si dhe një aparaturë elektronike për detektimin e metaleve të çmuara.”

Më tej, në njoftim thuhet:

“Në një automjet tjetër u zbulua një sasi e dyshuar lënde narkotike, kokainë, e fshehur në një veshje të vendosur në kabinën e drejtuesit të mjetit. Rastet iu referuan strukturave kompetente për veprime të mëtejshme procedurale dhe hetimore.”

Autoritetet kanë nisur procedurat përkatëse hetimore për të zbardhur rrethanat e secilit rast dhe për të identifikuar personat e përfshirë.