Detaje të reja kanë dalë në lidhje me zhdukjen e Englant Koçi, për të cilin autoritetet dyshojnë se mund të jetë viktimë e një ngjarjeje kriminale.

Sipas informacioneve paraprake, një nga pistat kryesore të hetimit lidhet me kriptomonedhat dhe një shumë të konsiderueshme parash që ai pretendonte se zotëronte.

Mësohet se Koçi u kishte treguar personave të afërt se kishte siguruar rreth 500 mijë euro në kriptomonedha. Ky fakt po konsiderohet si një motiv i mundshëm për zhdukjen e tij, pasi dyshohet se autorët mund të kenë vepruar me qëllim përfitimin e aseteve dixhitale, të cilat aksesoheshin përmes telefonit celular.

Nga të dhënat paraprake rezulton se nga portofoli i tij elektronik janë kryer disa transferime në vlera të vogla, çka ka ngritur pikëpyetje nëse shuma e pretenduar ka ekzistuar realisht apo është mbivlerësuar.

Në të njëjtën kohë, hetuesit nuk përjashtojnë as pistat e tjera, ndërsa po verifikohet çdo lëvizje financiare dhe komunikim i fundit i viktimës së dyshuar.

Ndërkohë, një person i shpallur në kërkim në lidhje me çështjen njihet me nofkën “Dhelpra”. Sipas burimeve jozyrtare, ai dyshohet se ka përdorur substanca narkotike dhe njihet nga rrethi i ngushtë i personave të përfshirë në hetim, por deri tani nuk ka konfirmim zyrtar mbi rolin e tij.

Autoritetet vijojnë hetimet intensive për zbardhjen e plotë të rrethanave të zhdukjes.