Një operacion i Policisë së Shtetit ka përfunduar me arrestimin e Moisi Habilaj, i cili u ndalua mbrëmjen e sotme në zonën e Borshit.

Sipas burimeve policore, Habilaj është lokalizuar në një beach bar në pronësi të familjarëve të tij, ku dyshohet se qëndronte prej kohësh, ndërsa ndaj tij ishte në fuqi një urdhër-arresti për trafik të lëndëve narkotike.

Operacioni është zhvilluar nga forcat e Operacionales së Tiranës, të cilat, pas informacioneve të siguruara dhe përdorimit të metodave speciale të hetimit, kanë arritur të identifikojnë vendndodhjen e tij dhe të rrethojnë zonën.

Burime pranë hetimit bëjnë me dije se në momentin e ndërhyrjes, Habilaj ishte i maskuar me kapele dhe mjekër, në përpjekje për të shmangur identifikimin nga autoritetet.

Arrestimi është kryer pa incidente, ndërsa policia pritet të japë një njoftim zyrtar me detaje të plota mbi operacionin dhe rrethanat e ndalimit në orët në vijim.