Vendimi i qeverisë shqiptare për të mbështetur financiarisht me 4 milionë euro koncertin e reperit amerikan Kanye West ka tërhequr vëmendjen e mediave ndërkombëtare, të cilat kanë analizuar arsyetimin e kryeministrit Edi Rama dhe polemikat që kanë shoqëruar këtë vendim.

Në një postim në Facebook, Rama mbrojti financimin publik të koncertit, duke argumentuar se fondi u akordua në momentin e fundit për të shmangur anulimin e eventit dhe dëmtimin e imazhit të Shqipërisë.

“Ne ndamë 4 milionë euro në minutën e fundit për të shmangur turpërimin e Shqipërisë në sytë e gati 25 mijë vizitorëve të huaj nga 80 vende, të cilët kishin blerë tashmë bileta për të parë Kanye West, ndërsa shumë të tjerë kishin frikë se koncerti mund të anulohej”, u shpreh Rama.

Koncerti është planifikuar të mbahet më 11 korrik në periferi të Tiranës, në një stadium të përkohshëm të ndërtuar posaçërisht për këtë aktivitet.

Mediat ndërkombëtare vënë në dukje se Shqipëria është një nga vendet e pakta që i ka hapur dyert artistit, pasi disa shtete evropiane kanë refuzuar ta presin për shkak të deklaratave të tij të mëparshme.

Kanye West, i njohur edhe si Ye, është përballur me kritika të forta pas komenteve antisemite, lavdërimeve ndaj Adolf Hitlerit dhe publikimit të përmbajtjeve me simbole naziste. Vetë artisti ka deklaruar se sjellja e tij lidhej me çrregullimin bipolar dhe ka kërkuar falje për deklaratat që kanë shkaktuar reagime.

Sipas raportimeve, vende si Franca, Mbretëria e Bashkuar, Australia dhe Polonia nuk kanë lejuar zhvillimin e koncerteve të tij ose hyrjen në territor, ndërsa në periudhën e fundit ai ka performuar në Sllovaki, Holandë dhe Gjeorgji.

Nga ana tjetër, kryeministri Rama argumenton se koncerti pritet të sjellë të paktën 100 milionë euro të ardhura për ekonominë shqiptare, duke iu referuar rritjes së rezervimeve në hotele dhe strukturat akomoduese gjatë periudhës së zhvillimit të aktivitetit.

Artikulli ndalet edhe te debatet politike që kanë shoqëruar vendimin, duke kujtuar se Rama është përballur javët e fundit me protesta të vazhdueshme në Tiranë, të lidhura fillimisht me projektin e resortit luksoz të Jared Kushner dhe më pas me akuza për korrupsion dhe mënyrën e qeverisjes.

Financimi i koncertit të Kanye West është kthyer në një tjetër pikë përplasjeje në debatin publik, duke nxitur reagime të forta si në Shqipëri, ashtu edhe në mediat ndërkombëtare.