Erling Haaland është tashmë një nga emrat më të mëdhenj të futbollit botëror, por përveç golave dhe trofeve, sulmuesi norvegjez rezulton të ketë edhe një rekord botëror që daton nga fëmijëria e tij.

Bëhet fjalë për një rekord në atletikë: kërcimin së gjati nga vendi për moshat nën 6 vjeç. Sipas listave ndërkombëtare të rekordeve të të rinjve, Haaland, kur ishte vetëm 5 vjeç, ka kërcyer 1.63 metra.

Ky rezultat, i regjistruar për Erling Braut Haaland, i lindur më 6 janar 2000 në Bryne të Norvegjisë, konsiderohet një arritje e jashtëzakonshme për moshën e tij. Rekordi thuhet se është barazuar më vonë nga finlandezi Roope Tyynismaa, i cili arriti të njëjtën distancë disa vite pas Haalandit.

Vetë Tyynismaa ka deklaruar se nuk ishte në dijeni se mbante një rekord, pavarësisht se kërcimi i tij ishte regjistruar në listat sportive për të rinjtë.

Talenti fizik i Haalandit nuk ishte rastësi. Ai u rrit në një familje me tradita të forta sportive. Babai i tij, Alf-Inge Haaland, ka qenë futbollist i kombëtares norvegjeze dhe ka luajtur edhe për klube të njohura si Nottingham Forest, Leeds United dhe Manchester City.

Nëna e tij, Gry Marita Braut, ka qenë kampione norvegjeze në heptatlon, ndërsa edhe pjesëtarë të tjerë të familjes kanë pasur lidhje të forta me sportin.

Që në fëmijëri, Haaland nuk u përqendrua vetëm te futbolli. Ai ishte i suksesshëm edhe në ski fond dhe luante hendboll, një sport që në Norvegji praktikohet gjerësisht gjatë dimrit.

Trajnerët e tij të parë në akademinë e Bryne FK e inkurajuan që të merrej me disiplina të ndryshme sportive, duke besuar se kjo do ta ndihmonte në zhvillimin e shpejtësisë, koordinimit dhe aftësisë për të marrë vendime të shpejta në fushë.

Trajneri i tij i të rinjve, Alf Ingve Berntsen, theksonte se sportet e tjera mund të ndihmonin futbollistët e rinj në përmirësimin e aftësive.

“Fusha e hendbollit është më e vogël, ndeshjet janë më të shkurtra dhe ju duhet të mësoni të merrni vendime më shpejt”, u thoshte ai lojtarëve të rinj.

Historia e rekordit të vogël të Haalandit tregon se përpara se të bëhej një nga golashënuesit më të frikshëm në botë, ai ishte një fëmijë me aftësi të rralla fizike dhe një talent që shfaqej në shumë fusha sportive.