Një 26-vjeçar është arrestuar në Kavajë pas një operacioni të përbashkët mes strukturave të Policisë së Durrësit dhe Kavajës, pasi ishte shpallur në kërkim ndërkombëtar nga Interpol Roma.

I riu me inicialet S. B., banues në Kavajë, ishte në kërkim nga autoritetet italiane, pasi Gjykata e Breshias i kishte caktuar masën e sigurisë “Arrest në burg” për veprën penale “Pjesëmarrje në organizatë kriminale me qëllim trafikimin e lëndëve narkotike”.

Për këtë vepër penale, sipas autoriteteve italiane, parashikohet një dënim maksimal deri në 24 vite burgim.

Arrestimi u krye në kuadër të operacionit policor të koduar “Fast”, nga specialistët e Sektorit për Kërkimin (FAST Albania), në bashkëpunim me strukturat operacionale të Drejtorisë Vendore të Policisë Durrës dhe Komisariatin e Policisë Kavajë.

Sipas hetimeve të autoriteteve italiane, 26-vjeçari dyshohet se ka qenë pjesë e një organizate kriminale të përbërë kryesisht nga shtetas shqiptarë, por edhe nga shtetas italianë, e cila merrej me trafikimin e lëndëve narkotike dhe shpërndarjen e tyre në disa zona të Italisë.

Pas arrestimit të përkohshëm, pritet që të vijojnë procedurat ligjore për ekstradimin e tij drejt vendit fqinj.

“Interpol Tirana, në bashkëpunim me Interpol Romën, vijon procedurat për ekstradimin e 26-vjeçarit drejt Italisë”, bëri të ditur Policia e Shtetit.