Një i burgosur në burgun e Reçit i ka dhënë fund jetës. Agron Llapushi, 49 vjeç, është gjetur i varur me litar në ambientet e dusheve të burgut.

Llapushi, banues në Çekin të Gramshit, vuante dënimin për vrasjen e bashkëshortes së tij, Alketa Llapushi, në vitin 2015.

Në atë kohë, 49-vjeçari sapo ishte kthyer nga emigrimi në Greqi dhe, pas një konflikti për një tokë në Gramsh, mbyti bashkëshorten. Pas ngjarjes, Llapushi u dorëzua në polici dhe pranoi krimin.

Çifti kishte dy fëmijë. Gjatë viteve të vuajtjes së dënimit, Llapushi kishte pasur shumë pak kontakte me familjarët, me vetëm dy takime të regjistruara, në vitet 2023 dhe 2025.

Prokuroria kishte kërkuar burgim të përjetshëm, por Llapushi u dënua me 24 vite e 4 muaj burg për veprën penale “Vrasje për shkak të marrëdhënieve familjare”. Vendimi mori formë të prerë më 10 dhjetor 2015.

Në dëshminë e tij pas krimit, Llapushi kishte deklaruar se familja përballej me vështirësi ekonomike dhe se ai kishte kaluar një periudhë të vështirë psikologjike.

Për gjendjen e tij mendore ishte kryer edhe një ekspertizë psikiatriko-ligjore, e cila, sipas të dhënave të bëra publike, kishte arritur në përfundimin se ai nuk vuante nga ndonjë çrregullim psikik apo neuropsikik.