Një ngjarje e rëndë është regjistruar mbrëmjen e së premtes në Itali, ku një i ri me origjinë shqiptare ka humbur jetën si pasojë e një aksidenti rrugor.

Sipas mediave lokale italiane, viktima është një 19-vjeçar me banim në Monopoli. Ngjarja ka ndodhur rreth orës 23:00, kur automjeti tip “Mercedes-Benz” në të cilin ai ndodhej si pasagjer në sediljen e pasme është përplasur me një mjet tjetër tip “Toyota”, që drejtohej nga një grua.

Përplasja ka qenë tepër e fortë, duke bërë që të dy automjetet të humbnin kontrollin dhe të përplaseshin edhe me disa mjete të parkuara në anë të rrugës, duke shkaktuar dëme të konsiderueshme materiale.

Menjëherë në vendngjarje kanë mbërritur shërbimet e emergjencës, të cilat kanë transportuar të plagosurit drejt spitalit. Pavarësisht ndërhyrjes mjekësore, 19-vjeçari ka ndërruar jetë sapo ka mbërritur në spital, si pasojë e plagëve të marra.

Nga aksidenti kanë mbetur të lënduar lehtë edhe drejtuesja e “Toyota”-s dhe një tjetër pasagjer që ndodhej në automjetin “Mercedes-Benz”.

Autoritetet italiane kanë rrethuar zonën dhe kanë nisur hetimet për të përcaktuar shkaqet e sakta të aksidentit dhe rrethanat në të cilat ndodhi përplasja fatale.