Aktivisti shqiptar Baki Goxhaj, i ndaluar nga forcat izraelite gjatë një operacioni detar, pritet të kthehet në atdhe pas përfundimit të procedurave të dëbimit nga territori i Izraelit.

Sipas autoriteteve, Goxhaj fillimisht do të ndalojë në Turqi dhe më pas do të udhëtojë drejt Shqipërisë përmes aeroportit të Rinasit. Ai është mes dhjetëra aktivistëve të tjerë të ndaluar gjatë operacionit izraelit.

Ngjarja ka shkaktuar reagime edhe në Shqipëri. Ministri i Jashtëm ka dënuar publikisht publikimin e pamjeve të ndaluarve nga zyrtarë izraelitë, duke i cilësuar ato tronditëse dhe të papranueshme.

Në një reagim në rrjetin social X, ai theksoi se të gjithë personat e ndaluar duhet të trajtohen me dinjitet dhe në përputhje me ligjin ndërkombëtar dhe të drejtat e njeriut, ndërsa njoftoi se Ambasada shqiptare në Tel Aviv është udhëzuar të mbajë kontakte të vazhdueshme me autoritetet izraelite.

Aktivisti shqiptar ishte pjesë e flotiljes humanitare “Global Sumud”, e cila kishte nisur nga Marmarisi në Turqi me 426 aktivistë nga 39 shtete, me synim dërgimin e ndihmave në Gaza dhe tërheqjen e vëmendjes ndërkombëtare mbi situatën humanitare në rajon.