Kontrolli i Lartë i Shtetit (KLSH) ka evidentuar një sërë shkeljesh në procedurat e prokurimit të kryera nga Ndërmarrja e Shërbimeve Publike të Bashkisë Vlorë, duke çuar Agjencinë e Prokurimit Publik (APP) në propozimin e masave disiplinore dhe gjobave për dhjetëra zyrtarë.

Sipas vendimit të publikuar nga APP më 22 qershor 2026, verifikimi është kryer mbi indiciet e referuara nga KLSH dhe ka përfshirë 64 procedura prokurimi, përkatësisht 18 procedura të hapura, 17 të hapura të thjeshtuara dhe 29 me vlerë të vogël. Auditimi përfshin 44 kontrata furnizimi, 17 punësh dhe 3 shërbimesh.

Në raport konstatohen shkelje të ligjit “Për prokurimin publik”, veçanërisht në përllogaritjen e fondit limit, hartimin e specifikimeve teknike dhe përcaktimin e kritereve të kualifikimit.

Sipas APP-së, procedurat nuk janë zhvilluar në përputhje me nenin 34 të ligjit për fondin limit, ndërsa janë evidentuar mangësi edhe në zbatimin e nenit 36 për specifikimet teknike. Po ashtu, raporti thekson shkelje të neneve 77 dhe 78, si dhe të rregullave të Këshillit të Ministrave për prokurimet publike.

Në dokument theksohet se këto problematika mund të krijojnë hapësira për favorizime në tendera dhe përjashtim të operatorëve ekonomikë nga konkurrenca.

“Përllogaritja e gabuar e fondit lë hapësirë për abuzime me buxhetin e shtetit, ndërsa kriteret kufizuese mund të çojnë në eliminim artificial të operatorëve ekonomikë”, thuhet në analizën e APP-së.

Gjithashtu, janë konstatuar parregullsi edhe në vlerësimin e ofertave të paraqitura nga operatorët ekonomikë.

Në përfundim, APP ka propozuar masa disiplinore për 7 persona, ndërsa për 38 të tjerë janë propozuar gjoba administrative, duke argumentuar se përgjegjësia e tyre është evidentuar gjatë auditimit. Rasti cilësohet si një nga ndërhyrjet më të gjera të vitit 2026 në fushën e prokurimeve publike në nivel vendor.