Një ngjarje e rëndë është zbuluar në Hungari, ku autoritetet kanë arrestuar një 30-vjeçar të vetëshpallur si kanibal, i dyshuar për posedim dhe përdorim të paligjshëm të pjesëve të trupit të njeriut, të cilat dyshohet se i siguronte nga varreza të braktisura dhe përmes punës në një spital.

Sipas policisë, hetimi nisi pas informacioneve se i riu mbante mbetje njerëzore si në vendin e punës, ashtu edhe në banesën e tij në Budapest. Gjatë kontrollit të kryer më 17 qershor, hetuesit kanë zbuluar një sasi të konsiderueshme materialesh anatomike.

“Gjatë kontrollit u gjetën kafka, një këmbë e plotë, një dorë dhe një rindërtim i një fytyre njerëzore me lëkurë njerëzore”, bëhet e ditur në njoftimet paraprake të policisë.

Në një valixhe janë sekuestruar edhe kocka të tjera, ndërsa në një kavanoz është gjetur një zemër, origjina e së cilës ende po verifikohet nëse është njerëzore apo shtazore.

Gjatë marrjes në pyetje, 30-vjeçari ka pranuar se kishte mbledhur pjesë trupash njerëzorë, duke deklaruar se ishte i fiksuar pas tyre. Ai dyshohet se ka pohuar gjithashtu se i konsumonte si ushqim.

Aktualisht, ai ndodhet në paraburgim dhe akuzohet për përdorim të paligjshëm të kufomave njerëzore. Sipas policisë hungareze, i arrestuari kishte interes të theksuar për anatominë dhe patologjinë dhe merrej edhe me diseksionin e kafshëve.

Hetuesit po verifikojnë nëse pjesët njerëzore janë siguruar përmes punës së tij në spitale apo përmes zhvarrimeve në varreza të braktisura në Hungari dhe Sllovaki.

Ndërkohë, autoritetet kanë sekuestruar pajisje elektronike, përfshirë kompjuterë dhe telefona, të cilat pritet të analizohen në vijim. Hetimet vijojnë dhe nuk përjashtohet ngritja e akuzave të tjera.