Karabinierët në Cuneo të Italisë kanë finalizuar një operacion të befasishëm antidrogë, gjatë të cilit është arrestuar një shtetas shqiptar dhe janë sekuestruar sasi të mëdha droge dhe armësh.

Sipas autoriteteve italiane, në banesat e të dyshuarit Artur Hysenaj janë gjetur 22 kilogramë kokainë e pastër, me një vlerë të përllogaritur tregu mbi 5 milionë euro, si dhe një arsenal armësh përfshirë pesë pistoleta, silenciatorë dhe rreth 200 fishekë municionesh.

Mediat italiane e kanë cilësuar 47-vjeçarin si “bosi i drogës së kodrave”, duke raportuar se lënda narkotike ishte e destinuar për shpërndarje në zonën e Astit, në rajonin e Piemontes.

Operacioni u zhvillua me ndihmën e qenve antidrogë dhe zgjati disa ditë hetimesh të koordinuara nga prokuroria lokale. Droga dhe armët janë gjetur në dy ambiente të ndryshme, përfshirë një garazh në Via Palio.

Autoritetet theksojnë se një nga armët ishte e pajisur me karikator të mbushur dhe gati për përdorim në automjetin e të arrestuarit.

Hetimet vijojnë për të zbuluar rrjetin e plotë të trafikut të drogës ku dyshohet se ishte i përfshirë i arrestuari.