Një ngjarje e pazakontë është regjistruar në Sarandë, ku një 59-vjeçar ka mbetur i vetëplagosur gjatë një vizite familjare, ndërsa pas incidentit policia ka proceduar penalisht edhe një tjetër person.

Sipas të dhënave paraprake, i dëmtuari dyshohet se është plagosur aksidentalisht me armë zjarri brenda banesës së të afërmve ku ndodhej për vizitë. Pas ngjarjes, në hetim është përfshirë edhe kushëriri i tij 33-vjeçar, i cili dyshohet se ka fshehur armën e përdorur.

Autoritetet bëjnë me dije se arma nuk është gjetur ende, ndërsa rrethanat e plota të incidentit mbeten nën hetim.

Të dy personat janë proceduar penalisht dhe materialet i janë referuar Prokurorisë për veprime të mëtejshme.