Ministri i Mbrojtjes i Malit, gjenerali Sadio Camara, ka humbur jetën gjatë një serie sulmesh të koordinuara ndaj objekteve ushtarake në disa zona të vendit, sipas raportimeve ndërkombëtare.

Sipas burimeve të cituara, sulmi kryesor ka ndodhur në rezidencën e tij në qytetin ushtarak të Kati-t, ku është përdorur një makinë-bombë. Ngjarja raportohet të ketë ndodhur rreth 24 orë pas sulmeve të tjera të ndërmarra nga grupe të armatosura në disa rajone të Malit.

Camara ishte një nga figurat kyçe të juntës ushtarake që mori pushtetin pas grushteve të shtetit në 2020 dhe 2021 dhe konsiderohej një nga njerëzit më të fuqishëm në strukturat e reja të sigurisë së vendit.

Autoritetet raportojnë se sulmet janë kryer nga grupe të lidhura me “Jama’at Nusrat al-Islam wal-Muslimin” dhe fraksione të Frontit të Çlirimit të Azawad, të cilat më parë kanë qenë në konflikt me njëra-tjetrën, por tani dyshohet se kanë bashkëpunuar.

Sipas të njëjtave burime, sulme dhe përplasje janë regjistruar edhe në disa qytete të tjera, përfshirë Bamako, Gao, Kidal dhe Sevare, duke e përshkallëzuar situatën e sigurisë në vend.

Presidenti i përkohshëm Assimi Goïta raportohet se është zhvendosur në një zonë të sigurt dhe ndodhet jashtë rrezikut.

Ngjarja ka shkaktuar reagime të forta ndërkombëtare, ndërsa ekspertët paralajmërojnë për një përshkallëzim të mëtejshëm të konfliktit në rajon.