Pavarësisht masave të marra nga Sektori i Qarkullimit Rrugor, shkeljet nga mjetet e tonazhit të rëndë në Vlorë vijojnë të mbeten problem shqetësues.

Kamionë pa targa, mjete që transportojnë inerte pa mbulesë dhe që i derdhin ato përgjatë rrugës janë parë sërish duke qarkulluar në akset e qytetit, duke rrezikuar sigurinë rrugore dhe ndotur ambientin.

Vetëm pak ditë më parë, policia rrugore ndërhyri duke gjobitur nëntë mjete të tonazhit të rëndë për shkelje të ngjashme, por situata duket se nuk ka ndryshuar.

Qytetarët shprehen të shqetësuar për mungesën e respektimit të rregullave, ndërsa kërkojnë kontrolle më të forta dhe masa më të ashpra ndaj drejtuesve që vijojnë të qarkullojnë në kundërshtim me ligjin.