Bashkia e Vlorës ka hedhur për shqyrtim një projektvendim që parashikon rritjen e tarifës për shërbimin në plazhet publike të administruara nga njësia vendore, nga 500 në 700 lekë për setin çadër–shezlong.
Sipas dokumenteve shoqëruese, Drejtoria e Pronave Publike dhe Menaxhimit të Aseteve argumenton se tarifa aktuale prej 500 lekësh nuk mbulon kostot reale të shërbimit, përfshirë pagat, sigurimet, pastrimin ditor, mirëmbajtjen dhe amortizimin e pajisjeve.
Në relacion theksohet se një nivel më i ulët çmimi do të ndikonte drejtpërdrejt në cilësinë e shërbimit në plazhe, duke sjellë reduktim të stafit dhe standarde më të ulëta pastrimi dhe kontrolli gjatë sezonit turistik.
Sipas analizës ekonomike të bashkisë, kostoja e një çadre rezulton rreth 438 lekë pa TVSH, duke e bërë të pamundur funksionimin normal të shërbimit me tarifën aktuale prej 500 lekësh, e cila lë një diferencë minimale për mbulimin e shpenzimeve të tjera.
Për këtë arsye, tarifa e propozuar prej 700 lekësh vlerësohet si më e qëndrueshme financiarisht dhe e nevojshme për garantimin e standardeve të shërbimit në plazhet publike.
Ndërkohë, për zonat turistike si Plazhi i Vjetër, Zvërneci, Uji i Ftohtë, Radhima dhe Orikumi, tarifat për përdorimin e hapësirave publike për qëllime biznesi nuk pritet të ndryshojnë, duke mbetur në fuqi vendimet ekzistuese të Këshillit Bashkiak.
Projektvendimi do të shqyrtohet në Këshillin Bashkiak të Vlorës, në një periudhë kur çështja e menaxhimit të plazheve publike dhe tarifave në sezonin turistik mbetet në qendër të debatit publik.
