Deputetja Briseida Çakërri ka deklaruar se opozita nuk ka mbështetur me votë asnjë nga ligjet që lidhen me procesin e integrimit të Shqipërisë në Bashkimin Europian, duke e cilësuar qëndrimin e saj si pengues për reformat.

Në një intervistë, Çakërri tha se sjellja e opozitës në Kuvend nuk përputhet me deklaratat publike në mbështetje të integrimit europian, duke e akuzuar atë për mungesë koherence politike.

“Prova më e qartë është fakti se nuk kanë votuar asnjë prej ligjeve që lidhen me procesin e integrimit,” u shpreh ajo, duke theksuar se bëhet fjalë për një numër të konsiderueshëm aktesh ligjore të rëndësishme për afrimin me BE-në.

Ajo shtoi se opozita, sipas saj, ka ndryshuar qëndrim ndër vite, duke kaluar nga skepticizmi ndaj procesit të integrimit në një retorikë mbështetëse, por pa veprime konkrete në Kuvend.

Çakërri u shpreh gjithashtu se qeveria po vijon punën për përmbushjen e reformave të kërkuara në kuadër të procesit të integrimit, ndërsa opozita, sipas saj, po dëmton perceptimin ndërkombëtar të vendit përmes deklaratave politike.