Ministrja e Arsimit Mirela Kumbaro, gjatë interpelancës së kërkuar nga deputetë të opozitës për çështjen e licencimit të mësuesve, sqaroi se procesi nuk përbën një nismë të re të qeverisë, por një detyrim të përcaktuar prej vitesh në legjislacionin shqiptar.

Ajo iu referua ligjit për profesionet e rregulluara të vitit 2011 dhe ligjit për arsimin parauniversitar të vitit 2012, duke theksuar se kërkesat për kualifikim dhe certifikim profesional janë të përcaktuara qartë në kuadrin ligjor në fuqi.

Sipas saj, çdo person që ushtron profesionin e mësuesit duhet të ketë përfunduar studimet përkatëse të akredituara dhe të ketë dokumentacionin zyrtar të njohur nga autoritetet shqiptare, në përputhje me ligjin.

Ministrja sqaroi gjithashtu se ligji nuk ka fuqi prapavepruese, duke theksuar se mësuesit që kanë qenë të punësuar në sistem para hyrjes në fuqi të ligjit të vitit 2011 përjashtohen nga ky detyrim.

“Detyrimi për licencim dhe provimin e shtetit është i përcaktuar qartë në ligjin nr. 69/2012 dhe në ligjin për profesionet e rregulluara,” u shpreh Kumbaro, duke nënvizuar se praktikë profesionale dhe provimi i shtetit janë pjesë e procesit të kualifikimit për ushtrimin e profesionit të mësuesit.

Gjatë fjalës së saj, ministrja kritikoi edhe mungesën e një pjese të deputetëve të opozitës në sallë gjatë interpelancës, duke e cilësuar atë si mungesë interesi për diskutimin e çështjes.