Një nga figurat më të njohura të botës së krimit në Meksikë, Ismael “El Mayo” Zambada, është dënuar me burgim të përjetshëm nga një gjykatë federale në Shtetet e Bashkuara, dy vite pas arrestimit të tij në një operacion që i dha fund dekadave të arratisë.

76-vjeçari, bashkëthemelues i Kartelit të Sinaloas së bashku me Joaquín “El Chapo” Guzmán, pranoi fajësinë për akuzat që lidhen me trafikun e drogës dhe komplotin kriminal. Në bazë të marrëveshjes me prokurorinë, ai shmangu dënimin me vdekje, por u dënua me burgim të përjetshëm.

Vendimi u shpall nga Gjykata Federale në Bruklin, e cila urdhëroi gjithashtu Zambadan të paguajë 15 miliardë dollarë, shumë që sipas autoriteteve përfaqëson fitimet e përfituara nga aktiviteti i trafikut të drogës gjatë viteve të drejtimit të organizatës kriminale.

Gjatë seancës gjyqësore, Zambada foli përmes një përkthyesi në gjuhën spanjolle dhe kërkoi falje për pasojat e veprimtarisë së kartelit.

“Dhuna duhet të marrë fund. Shumë jetë humben, familje shkatërrohen dhe të rinj përfundojnë në një cikël që çon vetëm në burg ose vdekje”, u shpreh ai para gjykatës.

Arrestimi i Zambadas ndodhi në vitin 2024, pasi Joaquín Guzmán López, djali i “El Chapos”, e bindi se po udhëtonin drejt veriut të Meksikës për të inspektuar pista ajrore të fshehta. Megjithatë, avioni u ul në Teksas, ku autoritetet amerikane e arrestuan menjëherë.

Në dëshminë e tij, Zambada pranoi rolin në ndërtimin dhe drejtimin e një rrjeti kriminal që për dekada transportoi sasi të mëdha kokaine dhe drogash të tjera drejt Shteteve të Bashkuara. Karteli i Sinaloas konsiderohet një nga organizatat më të fuqishme të trafikut të drogës në botë.

Pas arrestimit të tij, brenda kartelit kanë shpërthyer përplasje mes fraksioneve rivale, duke shkaktuar një valë dhune dhe zhdukjesh në shtetin meksikan të Sinaloas.

Megjithatë, ekspertët vlerësojnë se dënimi i Zambadas nuk pritet të ndikojë ndjeshëm në aktivitetin e kartelit, pasi organizatat kriminale të këtij niveli zakonisht riorganizohen shpejt pas humbjes së drejtuesve të tyre.

Edhe bashkëthemeluesi tjetër i Kartelit të Sinaloas, Joaquín “El Chapo” Guzmán, po vuan një dënim me burgim të përjetshëm në Shtetet e Bashkuara.