Partia Demokratike dega Lezhë ka reaguar ashpër pas dhunimit të ish-kreut të saj në Dajç të Zadrimës, Sokol Toma, duke e cilësuar ngjarjen si një akt të rëndë dhe alarmues për sigurinë publike në vend.

Përmes një reagimi të publikuar në rrjetet sociale, PD Lezhë dënoi atë që e quajti “dhunë barbare” ndaj ish-zyrtarit demokrat dhe kërkoi nga institucionet ligjzbatuese zbardhjen e plotë të ngjarjes, identifikimin e autorëve dhe ndëshkimin e tyre.

“Kjo ngjarje është tronditëse dhe e papranueshme për çdo shoqëri demokratike, ndërsa përbën një tjetër këmbanë alarmi për gjendjen e rëndë të rendit dhe sigurisë publike në Lezhë dhe në të gjithë vendin”, thuhet në reagim.

Demokratët kërkuan reagim të shpejtë nga Policia e Shtetit dhe organet e drejtësisë, duke paralajmëruar se çdo vonesë apo heshtje vetëm sa rrit mosbesimin e qytetarëve ndaj institucioneve.

“I kërkojmë Policisë së Shtetit, Prokurorisë dhe të gjitha organeve ligjzbatuese që të veprojnë për zbardhjen e plotë të kësaj ngjarjeje, identifikimin e autorëve dhe vënien e tyre përpara drejtësisë”, theksohet më tej në deklaratë.

PD Lezhë shprehu gjithashtu solidaritet dhe mbështetje për Sokol Tomën dhe familjen e tij, ndërsa hetimet për ngjarjen vijojnë ende nga autoritetet.