Deputeti i Partia Socialiste, Erion Braçe, ka komentuar përplasjet e fundit brenda kampit socialist mes kryeministrit Edi Rama dhe ish-ministres së Jashtme Elisa Spiropali, duke pranuar se shqetësimet e ngritura prej saj janë reale dhe ndihen edhe nga deputetë të tjerë të PS-së.

Në një intervistë televizive, Braçe u shpreh se fenomeni i “ministrokracisë” dhe “drejtorokracisë” krijon pabarazi brenda partisë dhe ndikon edhe në raportin mes deputetëve dhe qeverisë.

“Personalizimin e pushtetit e vuan edhe qeverisja, edhe ne si deputetë. Ministrokracinë dhe drejtokracinë e vuajmë edhe ne si deputetë”, deklaroi Braçe.

Ai theksoi se ekziston një diferencë e dukshme mes deputetëve që mbajnë edhe poste ministrore dhe atyre që nuk kanë në dispozicion strukturat shtetërore.

“Është pabarazi mes atyre që janë edhe deputetë, edhe ministra dhe kanë gjithë hierarkinë e shtetit me vete. Çfarë problemi ka të flasësh për këtë?”, u shpreh ai.

I pyetur nëse Rama mund ta përjashtojë Spiropalin nga grupi parlamentar socialist, Braçe dha një përgjigje të prerë, duke theksuar se vendime të tilla nuk merren nga individë.

“Përjashton partia, jo individët. Mendoj se PS nuk përjashton”, tha deputeti socialist.

Braçe shtoi se debatet e brendshme janë të nevojshme për funksionimin e partisë dhe nuk duhet të konsiderohen si sulm ndaj pushtetit.

“Duhet t’i themi gjërat në sy për gjërat që nuk shkojnë dhe të kemi bonsensin t’i pranojmë, se nuk është sakrilegj të pranosh kritika për pushtetin”, përfundoi ai.