Një dron rus ka goditur një ndërtesë banimi në Rumani në orët e para të mëngjesit të së premtes, duke shkaktuar zjarr dhe plagosjen e dy personave.

Lajmi është konfirmuar nga Ministria e Mbrojtjes e Rumanisë, e cila bëri të ditur se droni u rrëzua në qytetin Galați, pranë kufirit me Ukrainë, në kohën kur forcat ruse po kryenin sulme ajrore në territorin ukrainas.

Sipas Inspektorati i Përgjithshëm për Situatat e Emergjencës, ngarkesa shpërthyese e dronit detonoi pas përplasjes, duke shkaktuar zjarr në katin e dhjetë të pallatit.

Autoritetet rumune e kanë cilësuar incidentin si rastin e parë ku qytetarë rumunë lëndohen drejtpërdrejt nga një dron rus që hyn në territorin e vendit gjatë luftës në Ukrainë.

Deri tani, Rusi nuk ka reaguar zyrtarisht për incidentin.

Ndërkohë, Ministria e Jashtme e Rumanisë e quajti ngjarjen një “përshkallëzim serioz dhe të papërgjegjshëm nga Federata Ruse”.

“Ky incident përfaqëson një përshkallëzim serioz dhe të papërgjegjshëm nga ana e Federatës Ruse”, deklaroi ministria, duke shtuar se Bukureshti ka informuar NATO dhe ka kërkuar përshpejtimin e transferimit të kapaciteteve kundër dronëve në Rumani.

Shërbimet e emergjencës njoftuan se dy persona morën ndihmë mjekësore për plagë të lehta, ndërsa rreth 70 banorë u evakuuan nga ndërtesa deri në neutralizimin e zjarrit.