Shkencëtarët po paralajmërojnë se bota mund të përballet me një nga episodet më të forta të fenomenit klimatik El Niño, i cili mund të sjellë valë ekstreme të të nxehtit, përmbytje shkatërruese dhe thatësira të zgjatura në shumë rajone të globit.

Sipas Organizatës Botërore Meteorologjike Organizata Botërore Meteorologjike, një episod i ri i El Niño pritet të zhvillohet gjatë këtij viti dhe mund të arrijë intensitet shumë të lartë, megjithëse parashikimet mbeten të pasigurta në këtë fazë të vitit.

Meteorologu amerikan Jeff Berardelli ka paralajmëruar se bota mund të përballet me fenomene atmosferike të papara më parë.

“El Niño rishpërndan nxehtësinë në planet. Sa më shumë nxehtësi të çlirohet nga Paqësori, aq më të forta do të jenë valët e të nxehtit, përmbytjet dhe thatësirat”, tha ai.

Çfarë është El Niño?

El Niño është një fenomen natyror klimatik që ndodh kur ujërat në pjesën ekuatoriale të Oqeanit Paqësor ngrohen ndjeshëm, duke ndikuar në modelet globale të motit, reshjeve dhe temperaturave. Ai zakonisht ndodh çdo dy deri në shtatë vjet dhe mund të zgjasë deri në një vit.

Fenomeni i kundërt, La Niña, sjell ftohje të ujërave oqeanike dhe kushte të ndryshme klimatike në mbarë botën.

Paralajmërime për një episod të pazakontë

Klimatologët thonë se anomalitë e ujërave të ngrohta në Paqësor janë ndër më të mëdhatë e regjistruara ndonjëherë, duke rritur frikën për një “El Niño” të fortë.

Studiuesi Daniel Swain ka deklaruar se ekziston potenciali për një fenomen “vërtet të jashtëzakonshëm”, duke theksuar se disa kushte kyçe tashmë janë duke u formuar.

Pasojat globale

Një El Niño i fortë mund të sjellë temperatura rekord globale, reshje ekstreme dhe përmbytje në disa rajone, ndërsa zona të tjera mund të përballen me thatësira të thella.

Sipas ekspertëve, ndikime mund të ndihen në SHBA, Amazonë dhe zona të tjera tropikale, ndërsa sezoni i uraganeve në Atlantik mund të dobësohet.

Shkencëtari i klimës Michael Mann thekson se, pavarësisht ndikimit të El Niño, shqetësimi kryesor mbetet ngrohja globale afatgjatë.

“Problemi kryesor është trendi i vazhdueshëm i ngrohjes globale, i nxitur nga djegia e lëndëve djegëse fosile”, tha ai.