Detaje të reja kanë dalë nga operacioni i koduar “Gun Expert”, ku është arrestuar Altin Celami, 46 vjeç, nga Tirana, i njohur prej më parë për veprimtari të paligjshme në tregtimin e armëve.

Sipas burimeve zyrtare, Celami u ndalua në Rrugën e Dibrës teksa drejtonte automjetin e tij tip taksi, që e përdorte për të shmangur kontrollet policore. Gjatë kontrollit të mjetit dhe banesës, policia gjeti dhe sekuestroi 4 armë zjarri pistoletë, municion luftarak, lëndë narkotike të llojit kokainë dhe pjesë të ndryshme armësh.

Nga hetimet rezulton se 46-vjeçari furnizonte grupe kriminale me armë, ndërsa në të kaluarën ishte arrestuar edhe në vitin 2022 për të njëjtën veprimtari dhe ishte pezulluar nga funksionet ushtarake në repartin e Pezë Helmës.

Operacioni u zhvillua nga Komisariati i Policisë Nr. 4, në bashkëpunim me Seksionin e Trafiqeve të DVP Tiranë, nën drejtimin e Prokurorisë së Tiranës, me përdorimin e metodave speciale të hetimit.

Policia po punon për identifikimin e bashkëpunëtorëve të tjerë, ndërsa ndaj Celamit rëndojnë akuzat për “Mbajtje pa leje dhe prodhim armësh” dhe “Prodhim e shitje narkotikësh”.