Një grup grabitësish shqiptarë të armatosur është goditur nga policia greke gjatë një operacioni të zhvilluar në fundjavë, ku katër persona përfunduan në pranga, mes tyre edhe një grua shqiptare.

Sipas mediave greke dhe autoriteteve lokale, grupi dyshohet se ishte kthyer në një rrezik serioz për zonën e Thermo, ndërsa po hetohet për një sërë grabitjesh dhe tentativash grabitjeje.

Hetimet zbuluan se dy prej të arrestuarve ishin arratisur nga qendrat e paraburgimit, ndërsa një tjetër ishte kapur teksa ndodhej me leje 6-ditore nga burgu.

Pas urdhrit të Prokurorisë së Shkallës së Parë të Aitoloakarnanias, autoritetet greke publikuan identitetet e të arrestuarve:

* Romeo Qosja, 42 vjeç
* Lefter Toçi, 42 vjeç
* Mariol (Arsen alias Marjel) Toska/Tojka, 38 vjeç
* Fatbardha Sehi, 35 vjeçe

Ndaj tyre rëndojnë akuza për tentativë grabitjeje të kryer në grup dhe me armë, dhunë ndaj zyrtarëve, armëmbajtje pa leje dhe shkelje të ligjit për armët.

Ngjarja që çoi në zbardhjen e grupit ndodhi në fillim të prillit, kur tre prej të dyshuarve, me fytyrat e mbuluara, hynë në banesën e një çifti të moshuar në Thermo, duke i kërcënuar me armë dhe ushtruar dhunë ndaj burrit të shtëpisë.

Sipas raportimeve të Protothema, grabitësit u zbuluan nga djali i çiftit, çka i detyroi të largoheshin me shpejtësi. Gjatë arratisjes, njëri prej tyre qëlloi dy herë në ajër, pa shkaktuar të lënduar.

Policia greke organizoi më pas një operacion të koordinuar për arrestimin e grupit. Një automjet ku udhëtonte Fatbardha Sehi u ndalua pranë kryqëzimit të Sykias, ndërsa dy nga të dyshuarit meshkuj u gjetën të fshehur në bagazh.

Në të njëjtën kohë, anëtari i katërt i grupit u lokalizua në një banesë me qira dhe u arrestua pas një tentative për t’u larguar sapo pa policinë.

Gjatë kontrolleve, autoritetet sekuestruan një pushkë luftarake me dy karikatorë të lidhur me shirit izolues, 57 fishekë dhe sende të ndryshme veshjeje që dyshohet se përdoreshin gjatë grabitjeve.

Hetimet vijojnë për të zbuluar nëse grupi është i përfshirë edhe në raste të tjera kriminale në territorin grek.