Komisioni Evropian ka paralajmëruar mundësinë e vendosjes së masave të përkohshme ndaj kompanisë “Meta”, në kuadër të një hetimi për dyshime mbi shkelje të rregullave të konkurrencës në Bashkimin Evropian.

Hetimi lidhet me vendimin e kompanisë për të kufizuar aksesin në WhatsApp për ofruesit rivalë të inteligjencës artificiale, një veprim që më pas u zëvendësua me një model me pagesë.

Zëvendëspresidentja e Komisionit Evropian, Teresa Ribera, tha se ky ndryshim nuk e ndryshon vlerësimin paraprak të Brukselit për sjelljen e kompanisë.

“Zëvendësimi i ndalimit ligjor me një çmim që prodhon të njëjtin efekt nuk ndryshon qëndrimin tonë fillestar,” u shpreh Ribera, duke theksuar se praktika mund të përbëjë abuzim me pozitën dominuese në treg.

Sipas Komisionit, masat e përkohshme synojnë të garantojnë akses të barabartë për rivalët e IA-së në WhatsApp, deri në përfundimin e hetimit.

“Meta” ka të drejtë të paraqesë kundërshtimet dhe propozimet e saj, ndërsa në rast shkeljesh të konfirmuara, mund të përballet me gjoba të konsiderueshme.

Paralelisht, kompania është nën hetim edhe për çështje të tjera në BE, përfshirë transparencën e të dhënave, menaxhimin e përmbajtjeve të paligjshme dhe mbrojtjen e të miturve në platformat e saj.