Kreu i lëvizjes “Shqipëria Bëhet”, Adriatik Lapaj, ka hedhur akuza të rënda ndaj administratës shtetërore, duke denoncuar nga protesta para Kryeministrisë atë që ai e cilëson si një skandal masiv me paga fiktive.

Sipas Lapajt, mijëra persona përfitojnë paga nga shteti pa u paraqitur kurrë në vendin e punës, ndërsa një pjesë e tyre jetojnë prej vitesh jashtë Shqipërisë. Ai deklaroi se skema funksionon përmes pagesës së sigurimeve shoqërore për efekt pensioni, ndërkohë që paga përfundojnë në xhepat e atyre që i kanë futur formalisht në punë.

“Ka mijëra persona që hajnë meze tek lokali i lagjes pa shkuar në punë dhe marrin rrogën. Ka dhe mijëra të tjerë që jetojnë jashtë shtetit dhe marrin pagën”, u shpreh Lapaj.

Ai solli edhe shembuj konkretë, duke përmendur institucione publike ku, sipas tij, figurojnë të punësuar persona që jetojnë në SHBA apo në Europë. “Ka njerëz që jetojnë në New York dhe marrin rrogë në Ujësjellës, marrin rrogë në ushtri. Ai jeton në Gjermani e Amerikë. Shiko çfarë marifeti kanë bërë. Paguajnë vetëm sigurimet për efekt pensioni dhe pagën e tyre e përfitojnë ata që i kanë futur në punë”, tha ai.

Lapaj theksoi se nuk ndikohet nga presioni politik dhe sulmet ndaj tij, duke iu drejtuar drejtpërdrejt patronazhistëve. “Patronazhistët ta dinë se nuk më ndikojnë fare”, deklaroi ai, ndërsa e cilësoi këtë fenomen si një dëm të rëndë për shtetin dhe qytetarët.

“Si mos t’i them unë këto gjëra? Është tradhti ndaj atdheut”, përfundoi Lapaj, duke kërkuar hetim dhe përgjegjësi për abuzimet me paratë publike.