Një shtetas shqiptar është dënuar me 7 vite e 10 muaj burg në Nottingham të Britanisë së Madhe, pasi policia zbuloi armë zjarri dhe një sasi të konsiderueshme droge në apartamentin ku ai jetonte ilegalisht.

Sipas mediave britanike, 41-vjeçari Ervis Doksani, baba i dy fëmijëve, dyshohet se kishte rolin e ruajtësit të armëve dhe rreth 10 kilogramëve lëndë narkotike në banesën që shërbente si depo për aktivitet kriminal.

Gjatë kontrollit në apartament, policia gjeti një pistoletë të fshehur në një dollap kuzhine, ndërsa tre armë të gjata, njëra prej tyre e mbushur, ishin fshehur brenda një tapeti pranë shtratit. Në banesë u zbuluan gjithashtu municione dhe pako kanabisi të paketuara me vakum.

Hetimet zbuluan se Doksani kishte hyrë ilegalisht në Britani, i fshehur në pjesën e pasme të një kamioni, dhe kishte qëndruar në vend prej rreth dy vitesh, pavarësisht se ishte dëbuar më herët dy herë.

Në Gjykatën e Kurorës në Nottingham, gjyqtari Mark Watson e cilësoi shqiptarin si “një kriminel të rrezikshëm me eksperiencë”, duke theksuar përfshirjen e tij në nivele të larta të krimit të organizuar.

Nga ana e tij, Doksani pretendoi se kishte një borxh prej 32 mijë eurosh dhe ishte detyruar të punonte ilegalisht për ta shlyer. Ai deklaroi gjithashtu se disa prej armëve i kishte menduar si armë sportive ose të rreme.

Sipas prokurorisë britanike, ai kishte punuar më herët në sektorin e ndërtimit, por kishte humbur vendin e punës pas verifikimeve mbi statusin e tij të paligjshëm, duke mbetur më pas pa strehim.