Shqiptari Astrit Hasani, i njohur me nofkën “Titi”, ka mbetur i plagosur pas një shkëmbimi zjarri me policinë greke në zonën e Mikrolimanos, ndërsa në posedim të tij janë gjetur armë, granata dhe municione të shumta.

Ngjarja ka ndodhur në orët e para të mëngjesit, pak para orës 05:00, gjatë një kontrolli rutinë të policisë greke. Sipas autoriteteve, efektivët i kanë bërë shenjë 42-vjeçarit të ndalonte, por ai ka tentuar t’i shmanget kontrollit.

Mediat greke raportojnë se në momentin e ndërhyrjes, Hasani ka nxjerrë armën dhe e ka drejtuar ndaj policëve, duke sjellë reagimin e menjëhershëm të forcave të rendit dhe shkëmbimin e zjarrit.

Si pasojë, shqiptari ka mbetur i plagosur dhe është transportuar me ambulancë në Spitalin Attikon, ku mësohet se ndodhet jashtë rrezikut për jetën.

Gjatë kontrollit në vendngjarje, policia ka sekuestruar dy pistoleta, një revolver, municione të ndryshme dhe një çantë me gjashtë granata. Po ashtu, autoritetet bëjnë me dije se 42-vjeçari nuk kishte me vete dokumente identifikimi.

Pas incidentit, zona u izolua nga forcat speciale dhe njësitë antieksploziv, të cilat kryen procedurat për neutralizimin dhe sigurimin e arsenalit të gjetur.

Sipas mediave greke, Astrit Hasani dyshohet të ketë lidhje me persona të njohur të botës së krimit dhe aktivitetit të natës në Greqi, ndërsa hetimet tashmë janë marrë në dorë nga Drejtoria e Krimit të Organizuar.