Një studim i ri i publikuar në revistën shkencore “Biological Psychiatry: Global Open Science” sugjeron se grumbullimi i “mbetjeve” në tru, si pasojë e një sistemi pastrimi të dëmtuar, mund të rrisë ndjeshëm rrezikun për zhvillimin e psikozës dhe çrregullimeve si skizofrenia.

Hulumtimi është realizuar nga një ekip i Universitetit të Gjenevës (University of Geneva), në Departamentin e Psikiatrisë dhe Qendrën për Neuroshkencë në Shëndetin Mendor (Synapsy). Studimi u udhëhoq nga studiuesi Alessandro Pascucci dhe është raportuar nga “Science Alert”.

Sipas kërkuesve, problemi lidhet me sistemin glinfatik të trurit – mekanizmi që largon mbetjet metabolike dhe toksinat gjatë funksionimit normal. Kur ky sistem nuk funksionon si duhet, mbetjet mund të grumbullohen dhe të ndikojnë në ekuilibrin kimik të trurit, duke rritur rrezikun për çrregullime psikotike.

Studimi thekson gjithashtu se sa më i dobët të jetë ky sistem, aq më i madh bëhet çrregullimi i neurotransmetuesve, një faktor i lidhur ngushtë me psikozën.

Një tjetër gjetje e rëndësishme është se ndryshimet mund të nisin që në fëmijëri dhe të zhvillohen gradualisht, shumë kohë përpara shfaqjes së simptomave klinike.

Studiuesit theksojnë se këto rezultate mund të ndihmojnë në zbulimin e hershëm të personave në rrezik dhe në zhvillimin e trajtimeve të reja parandaluese për çrregullimet mendore.