Çmimi i naftës në tregjet ndërkombëtare ka shënuar rënie të ndjeshme, duke arritur nivelin më të ulët në gati tre muaj. Nafta referuese Brent zbriti në 77 dollarë për fuçi, ndërsa nafta bruto amerikane u tregtua me 73.1 dollarë për fuçi.

Rënia e çmimeve lidhet kryesisht me përparimin e raportuar në negociatat mes SHBA-së dhe Iranit, si dhe me uljen e tensioneve në Lindjen e Mesme. Sipas analistëve, marrëveshja e përkohshme e arritur mes palëve ka ndikuar në stabilizimin e tregjeve, duke sjellë një ulje të konsiderueshme të çmimit të naftës krahasuar me nivelet e mëparshme.

Ndikim në treg ka pasur edhe vendimi i Uashingtonit për të dhënë një përjashtim të përkohshëm 60-ditor, që u lejon blerësve ndërkombëtarë të vazhdojnë importin e naftës dhe produkteve iraniane.

Pas bisedimeve të zhvilluara në Zvicër, përfaqësuesit e SHBA-së dhe Iranit njoftuan se është arritur progres fillestar dhe se do të krijohen katër grupe pune për çështjet që lidhen me programin bërthamor iranian dhe sanksionet ekonomike. Megjithatë, palët vijojnë të kenë mosmarrëveshje për disa tema kyçe.

Ndërkohë, furnizimi global është rritur edhe nga eksportet më të larta të vendeve të Gjirit Persik. Kuvajti dhe Emiratet e Bashkuara Arabe kanë shtuar dërgesat përmes rrugëve alternative, ndërsa Irani ka eksportuar mbi 30 milionë fuçi naftë vetëm gjatë javës së fundit.

Ekspertët vlerësojnë se ecuria e ardhshme e çmimeve të energjisë do të varet nga zhvillimi i negociatave SHBA-Iran, qëndrueshmëria e armëpushimit në Lindjen e Mesme dhe normalizimi i plotë i trafikut në Ngushticën e Hormuzit, një nga rrugët më të rëndësishme për tregtinë globale të naftës.