Autoritetet në Nagasaki kanë lëshuar urdhër për evakuimin e pothuajse të gjithë 380,000 banorëve, pas reshjeve të dendura të shiut që kanë rritur ndjeshëm rrezikun e përmbytjeve dhe rrëshqitjeve të dheut.

Sipas transmetuesit publik NHK, niveli i dytë më i lartë i alarmit është shpallur në pjesën jugore të qytetit, ndërsa banorëve u është kërkuar të shmangin zonat e rrezikshme dhe të ndjekin udhëzimet e autoriteteve lokale.

Agjencia Meteorologjike e Japonisë paralajmëroi se reshjet intensive do të vazhdojnë në rajonin jugperëndimor të ishullit Kyushu, me rrezik të shtuar për daljen nga shtrati të lumenjve dhe përmbytje në zonat e ulëta. Në gjendje të rrezikut të lartë ndodhen edhe prefekturat Fukuoka, Saga dhe Kumamoto, ndërsa reshje të forta priten edhe në ishullin Shikoku.

Autoritetet bëjnë me dije se situata është ndikuar edhe nga zhvillimi i dy cikloneve tropikale në jug të vendit, që pritet të përkeqësojnë më tej kushtet atmosferike.

Japonia po përjeton vitet e fundit një rritje të ngjarjeve ekstreme të motit, të cilat shkencëtarët i lidhin me ndryshimet klimatike, ndërsa rrëshqitjet e dheut janë bërë gjithnjë e më të shpeshta për shkak të terrenit malor dhe reshjeve intensive.